თბილისი, 9 აგვისტო — Sputnik. საქართველოს შინაგან საქმეთა სამინისტროს თანამშრომლებმა თბილისში ირანის 27 წლის მოქალაქე დააკავეს, რომელსაც ნარკოტიკული საშუალებების უკანონო შეძენა-შენახვა ედება ბრალად, აღნიშნულია უწყების ვებ-გვერდზე განთავსებულ განცხადებაში.
სამართალდამცველებმა დაკავებულის პირადი და კუთვნილი მოპედის ჩხრეკისას ნარკოტიკული საშუალების 425 აბი ამოიღეს, რაც 0,9184 გრამ ბუპრენორფინს შეიცავს.
გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე მიმდინარეობს, რაც სასჯელის სახით 8-დან 20 წლამდე ან უვადო პატიმრობას ითვალისწინებს.
ეს საქართველოში ნარკოდანაშაულისთვის ირანის მოქალაქის დაკავების უკვე მესამე შემთხვევაა. რამდენიმე დღის წინ ირანის ორი მოქალაქე ანაკლიის მიმდებარე ტერიტორიაზე დააკავეს, სადაც ელექტრონული მუსიკის ფესტივალი GEM Fest მიმდინარეობს.
