თბილისი, 8 აგვისტო — Sputnik. საქართველოს შსს-ს თანამშრომლებმა ნარკოდანაშაულისთვის სოფელ განმუხურში, კურორტ ანაკლიის მიმდებარედ, სადაც ელექტრონული მუსიკის ფესტივალი GEM Fest ტარდება, ერთი ადამიანი დააკავეს, იუწყება საინფორმაციო სააგენტო Новости-Грузия უწყების პრეს-სამსახურზე დაყრდნობით.
შსს-ს პრეს-სამსახურის ინფორმაციით, ამოღებული ნარკოტიკების სახეობა და რაოდენობა ზუსტდება.
ამასთან ერთად საზოგადოებრივი მაუწყებლის პირველი არხი იუწყება, რომ დაკავებულია ორი ადამიანი და ისინი უცხოეთის მოქალაქეები არიან, თუმცა ეს ინფორმაცია შსს-ში არ დაადასტურეს.
GEM Fest-ის ტერიტორიაზე ნარკოტიკების უკანონო მიმოქცევის თემა აქტუალური გახდა მას შემდეგ, რაც გასულ კვირაში ზუგდიდის საავადმყოფოში ფესტივალზე მყოფი 22 წლის სტუმარი გარდაიცვალა. წინასწარი მონაცემებით, გარდაცვალების მიზეზი ნარკოტიკული ინტოქსიკაცია იყო.
ამ დღის შემდეგ პრაქტიკულად ყოველდღე ზუგდიდის საავადმყოფოში ინტოქსიკაციით GEM Fest-ის ახალგაზრდა სტუმრები მიჰყავთ.
ბოლო დროს GEM Fest-ზე ნარკოტიკების უკანონო შეძენა-შენახვისთვის ექვსი ადამიანი დააკავეს.
