თბილისი, 6 აგვისტო — Sputnik. ავღანეთში თავდასხმის შედეგად დაღუპულ უმცროს სერჟანტს საქართველოში დღეს გადმოასვენებენ. მდინარ ბებიაშვილის ცხედრის საქართველოში გადმოსვენება ბაგრამის საავიაციო ბაზიდან, აშშ-ის საჰაერო ძალების სამხედრო თვითმფრინავით, სპეციალური რეისით მოხდება, იტყობინება ტელეკომპანია Rustavi 2.
საქართველოს შეიარაღებული ძალების სახმელეთო ჯარების დასავლეთ სარდლობის II ქვეითი ბრიგადის 23-ე ბატალიონის სამხედრო მოსამსახურე, „მტკიცე მხარდაჭერის“ მისიას ბაგრამის საავიაციო ბაზაზე ასრულებდა.
ის ავღანეთში 3 აგვისტოს მოტორიზებული პატრულირების დროს თვითმკვლელი ტერორისტის თავდასხმის შედეგად დაიღუპა.
25 წლის მდინარ ბებიაშვილი წარმოშობით ზესტაფონის მუნიციპალიტეტის სოფელ მარტოთუბნიდან იყო. ის ავღანეთში რიგით მესამე სამხედრო მისიაში იღებდა მონაწილეობას.
