თბილისი, 4 აგვისტო — Sputnik. მილიონი ქათმის კვერცხი, რომელიც მწერების საწინააღმდეგო ტოქსიკურ ნივთიერებას შეიცავდა, გერმანიის, ნიდერლანდებისა და ბელგიის მაღაზიების დახლებზე მოხვდა, იუწყება "Sputnik-ბელარუსი" გერმანულ პორტალ Local-ზე დაყრდნობით.
ტოქსიკური ნივთიერება ფიპრონილის შემცველი კვერცხები თავდაპირველად ჰოლანდიასა და ბელგიაში აღმოაჩინეს. მოგვიანებით 900 000-მდე დაინფიცირებული კვერცხი გერმანიის მაღაზიების დახლებზე ჰოლანდიური ფერმებიდან მოხვდა.
ქვეყანაში არსებული 180-დან 147 მეფრინველეობის ფაბრიკიდან პროდუქციის მაღაზიებში მოწოდება აიკრძალა. შემოწმების დასრულებამდე, სანამ არ დადასტურდება, რომ მათი პროდუქცია ადამიანების ჯანმრთელობისათვის უსაფრთხოა, ფაბრიკები დაკეტილი იქნება.
საქმეს ქვეყნის პროკურატურა იძიებს.
ფიპრონილი გამოიყენება ტკიპების, ტილებისა და სხვა მავნე მწერების წინააღმდეგ. კატეგორიულად დაუშვებელია მისი გამოყენება იმ ცხოველების სამკურნალოდ, რომელთა ხორცი საკვებად გამოიყენება. ადამიანის ორგანიზმში მოხვედრისას ის იწვევს გულის რევას, თავის ტკივილს, კანის გაღიზიანებასა და ფარისებრი ჯირკვლის პრობლემებს. აგრეთვე ის არღვევს ღვიძლისა და თირკმლის ფუნქციას.
