თბილისი, 4 აგვისტო — Sputnik. რუსეთის სახელმწიფო სათათბიროს დეპუტატი მმართველი პარტია "ედინაია როსიადან" არტიომ კავინოვი თბილისში კერძო ვიზიტით იმყოფება და არაპოლიტიკურ დონეზე რიგ შეხვედრებს მართავს, განუცხადეს "Sputnik-საქართველოს" დეპუტატის პრეს-სამსახურში.
კავინოვი თბილისში ოთხშაბათს ჩამოვიდა. იმავე დღეს ის სრულიად საქართველოს კათოლიკოს-პატრიარქს, ილია მეორეს შეხვდა.
"ეს არის კერძო ვიზიტი ადამიანური ურთიერთობების დონეზე, ასე ვთქვათ… ესაა ვიზიტი, რომელსაც არანაირი პოლიტიკური სარჩული არ უდევს", — განაცხადეს დეპუტატის პრეს-სამსახურში.
კავინოვი საქართველოს შაბათს დატოვებს. მანამდე ეწვევა ქვეყნის მართლმადიდებლურ ტაძრებს.
არტიომ კავინოვი, სახელმწიფო სათათბიროს კომიტეტის წევრი დსთ-ის ქვეყნების, ევრაზიული ინტეგრაციისა და თანამემამულეებთან კავშირების საკითხებში, რუსი დეპუტატების იმ დელეგაციის შემადგენლობაში იყო, რომლებიც ამა წლის ივლისში მოსკოვში შეხვდნენ პარლამენტის დეპუტატებს საქართველოდან — ოპოზიციური პარტია "პატრიოტთა ალიანსის" წევრებს.
საქართველომ რუსეთთან დიპლომატიური ურთიერთობები 2008 წელს მოსკოვის მიერ აფხაზეთისა და ცხინვალის რეგიონის დამოუკიდებლობის აღიარების საპასუხოდ გაწყვიტა.
