თბილისი, 2 აგვისტო — Sputnik. საქართველოს პრემიერ-მინისტრმა გიორგი კვირიკაშვილმა შვეიცარიის ელჩს, ლუკას ბეგლინგერს ეროვნული დღესასწაული მიულოცა და ქვეყნებს შორის განსაკუთრებული ურთიერთობებზე ისაუბრა.
შვეიცარიის კონფედერაციის დაარსებისადმი მიძღვნილი ფედერალური დღესასწაული 1 აგვისტოს აღინიშნება.
"საქართველოს ნამდვილად გაუმართლა, რომ ჰყავს ისეთი მეგობარი, როგორიც შვეიცარიაა. მართალია, ვაჭრობას, ბიზნესსა და ინვესტიციებს ძალიან დიდი მნიშვნელობა აქვს საქართველო-შვეიცარიის ურთიერთობებში, მაგრამ ჩვენი თანამშრომლობა ბევრად უფრო ყოვლისმომცველია", — განაცხადა კვირიკაშვილმა საზეიმო მიღებაზე.
მან ასევე ისაუბრა საქართველოსა და შვეიცარიას შორის მსგავსებაზე.
"ისევე, როგორც შვეიცარიას, საქართველოსაც აქვს უდიდესი მემკვიდრეობა მთების სახით. ჩვენი მთიანი რეგიონები არის საქართველოს კულტურისა და ტრადიციების ნამდვილი საგანძური", — განაცხადა კვირიკაშვილმა.
საქართველოს პრემიერმა აღნიშნა შვეიცარიის როლი საქართველოში კონფლიქტების მშვიდობიანად მოგვარებაში და მადლობა გადაუხადა ქართველი ხალხის სახელით ქვეყნის სუვერენიტეტისა და ტერიტორიული მთლიანობის მხარდაჭერისა და ქართულ-რუსულ ურთიერთობებში შუამდგომლობისთვის.
