თბილისი, 21 ივლისი — Sputnik. თავისუფალი სტილით მოჭიდავე გიორგი გოგშელიძე პეკინის 2008 წლის ოლიმპიური თამაშების ვერცხლის პრიზიორი გახდა, აღნიშნულია საქართველოს სპორტის სამინისტროს ვებ–გვერდზე განთავსებულ განცხადებაში.
მედლის გადაცემის ცერემონია საქართველოს ეროვნული ოლიმპიური კომიტეტის (სეოკი) ოფისში გაიმართა.
2008 წლის ოლიმპიადაზე გოგშელიძემ 96 კილოგრამამდე წონით კატეგორიაში იასპარეზა და ბრინჯაოს მედალი მოიპოვა. თუმცა, 2008 წლის თამაშების ვერცხლის პრიზიორს, ყაზახ მოჭიდავე თეიმურაზ თიგიევს განმეორებითი დოპინგ-სინჯის დროს სისხლში აკრძალული პრეპარატის „ტურინაბოლის“ კვალი აღმოუჩინეს.
მას შემდეგ, რაც საერთაშორისო ოლიმპიურმა კომიტეტმა ყაზახი სპორტსმენის დისკვალიფიკაციის გადაწყვეტილება მიიღო, ჭიდაობის საერთაშორისო ფედერაციამ (UWW) გოგშელიძეს პეკინის ოლიმპიური ვერცხლი მიანიჭა.
ბრინჯაო, თავის მხრივ, კუბელ მიშელ ბატისტას გადაეცა.
