ელჩი: საქართველოს მოქალაქეები ყველაზე ხშირად საფრანგეთს სთხოვენ თავშესაფარს

თბილისი, 19 ივლისი — Sputnik. ევროკავშირთან უვიზო რეჟიმის ამოქმედების შემდეგ მნიშვნელოვნად გაიზარდა საქართველოს იმ მოქალაქეთა რაოდენობა, რომლებიც საფრანგეთს თავშესაფარს სთხოვენ, განაცხადა საქართველოს ელჩმა საფრანგეთში ეკატერინე სირაძე-დელონემ.

„თავშესაფრის მძებნელთა რაოდენობა მნიშვნელოვნად გაიზარდა… ჯერჯერობით ეს პრობლემა არ არის, მაგრამ მომავალში შესაძლოა გარკვეული პრობლემები შექმნას“, — განაცხადა ელჩმა ტელეკომპანია „იმედის“ ეთერში.

მისი თქმით, ევროკავშირთან უვიზო რეჟიმის შემოღების შემდეგ, ფრანგმა მესაზღვრეებმა საქართველოს 12 მოქალაქეს უთხრეს უარი ქვეყანაში შეშვებაზე.

შეგახსენებთ: ევროკავშირმა საქართველოს მოქალაქეებისთვის უვიზო რეჟიმი 2017 წლის 28 მარტს შემოიღო.

როგორც ცნობილია, ევროკავშირის ქვეყნებში სამოგზაუროდ საქართველოს მოქალაქეს თან უნდა ჰქონდეს:

•    ბიომეტრული პასპორტი,

•    სასტუმროს ჯავშანი ან ახლობლის მისამართი, სადაც აპირებს ცხოვრებას,

•    სამედიცინო დაზღვევა,

•    სახარჯი თანხა,

•    უკან დასაბრუნებელი ბილეთი.