თბილისი, 12 ივლისი — Sputnik. საქართველოს პრემიერ-მინისტრმა გიორგი კვირიკაშვილმა ენერგეტიკის მინისტრის პოსტზე ილია ელოშვილი წარადგინა.
კახი კალაძემ ენერგეტიკის მინისტრის პოსტი ივლისის დასაწყისში დატოვა, რადგან მმართველი პარტიის „ქართული ოცნება — დემოკრატიული საქართველოს" სახელით თბილისის მერის პოსტზე კენჭისყრას აპირებს.
ადგილობრივი ხელისუფლების ორგანოების არჩევნები ოქტომბერში გაიმართება.
„ენერგეტიკის მინისტრად მინდა წარმოგიდგინოთ ილია ელოშვილი. ილია ელოშვილი 2012 წლიდან იყო ენერგეტიკის მინისტრის პირველი მოადგილე და ყველა პროექტში, რომელიც სამინისტრომ განახორციელა, მას ძალიან მნიშვნელოვანი როლი აქვს", — განაცხადა კვირიკაშვილმა მთავრობის სხდომაზე.