თბილისი, 10 ივლისი — Sputnik. ქრცვინი, რომელიც ავიაკომპანია airBaltic-ის რეისით რომიდან რიგაში მგზავრობდა, გალიიდან გამოვიდა და თავის მეზობელს — ზღვის გოჭს თავს დაესხა, იუწყება "Sputnik-ლატვია" ტელეგადაცემა Panorāma-ზე დაყრდნობით.
ესმერალდა ბერტულემ, რომელიც რომიდან რიგაში მიფრინავდა, ზღვის გოჭი ბარგის განყოფილებაში ჩააბარა, ხოლო აეროპორტ "რიგაში" ჩასვლისას ის დასისხლიანებული და მკვდარი აღმოაჩინა.
ავიაკომპანიამ ამ შემთხვევის გამოძიება ჩაატარა. აღმოჩნდა, რომ ზღვის გოჭი ქრცვინმა მოკლა, ორივე ცხოველმა გალიებიდან გამოსვლა მოახერხა.
ზღვის გოჭის მფლობელს ავიაკომპანია ცხოველის ტრანსპორტირების ხარჯებს — 200 ევროს და მაქსიმალურ კომპენსაციას — 1395 ევროს გადაუხდის.
ავიაკომპანიაში განაცხადეს, რომ ამიერიდან სამგზავრო რეისებზე ქრცვინების ტრანსპორტირება აიკრძალება — ისინი მოგზაურობას მხოლოდ სატვირთო ხომალდებით შეძლებენ.
