თბილისი, 6 ივლისი — Sputnik. კომპანია Service Air პარასკევიდან იწყებს რეგულარული რეისების განხორციელებას თბილისსა და ბათუმს შორის.
ორშაბათობით, სამშაბათობით, ხუთშაბათობითა და შაბათობით რეისები დღეში ორჯერ შესრულდება, ხოლო პარასკეობითა და კვირაობით — სამჯერ. თვითმფრინავი მხოლოდ ოთხშაბათს არ იფრენს.
„საქართველოს აეროპორტების გაერთიანებამ" შეისყიდა ეს მომსახურება და, აქედან გამომდინარე, მგზავრობა იქნება საკმაოდ ხელმისაწვდომი… ფრენები ამ ფორმატით გაგრძელდება არა მხოლოდ ზაფხულის სეზონზე", — განაცხადა საქართველოს პრემიერ-მინისტრმა გიორგი კვირიკაშვილმა მთავრობის სხდომაზე.
საქართველოს მთავრობა იმედოვნებს, რომ რეგულარული რეისები თბილისსა და ბათუმს შორის ხელს შეუწყობს ტურიზმის, მათ შორის, შიდა ტურიზმის განვითარებას, აღნიშნულია საქართველოს ეკონომიკის სამინისტროს ვებ-გვერდზე გამოქვეყნებულ განცხადებაში.
ფრენებს შეასრულებს 32-ადგილიანი სამგზავრო თვითმფრინავი Saab. ბილეთის ღირებულება ერთი მიმართულებით 90 ლარია.
Service Air-ი ნატახტარის აეროდრომიდან უკვე ახორციელებს ფრენებს ქუთაისის, მესტიისა და ამბროლაურის მიმართულებით.
ბოლო წლებში საქართველოში ტურიზმი დინამიკურად ვითარდება. ტურისტების მნიშვნელოვანი ნაკადი ზაფხულის სეზონზე ძირითადად ზღვისპირეთზე მოდის, სადაც ტურისტებისთვის ერთ-ერთი პოპულარული ადგილი ბათუმია.
