თბილისი, 16 ივნისი — Sputnik. ჩინეთის მთავრობამ ქართულ მხარეს საჩუქრად გადასცა კომბინირებული კონტეინერის/სატრანსპორტო საშუალების მობილური შემოწმების სისტემა.
2015 წელს ჩინეთის მთავრობამ საქართველოს მთავრობას გამოუყო დახმარება 26 მილიონი ჩინური იუანის (დაახლოებით 4 მილიონი აშშ დოლარი) ოდენობით ახალი დანადგარის შესაძენად. ჩინეთის დახმარებით შეძენილი ტექნიკის დამონტაჟება „ყაზბეგის“ საბაჟო-გამშვებ პუნქტში 2017 წლის მაისში დასრულდა, ნათქვამია საქართველოს ფინანსთა სამინისტროს განცხადებაში.
ჩინეთის სახალხო რესპუბლიკის მთავრობის მიერ ეკონომიკური და ტექნიკური თანამშრომლობის ფარგლებში 2005 წლიდან დღემდე გრანტების სახით საქართველოსთვის უკვე გამოყოფილია 356 მლნ იუანი (დაახლოებით 54 მლნ აშშ დოლარი).
გარდა ამისა, ჩინეთმა საქართველოს 30 მლნ იუანის (შეთანხმების ხელმოწერისთვის დაახლოებით 5,2 მლნ აშშ დოლარი) ოდენობის 20-წლიანი უპროცენტო სასაქონლო კრედიტი გამოუყო 10-წლიანი შეღავათიანი პერიოდით.
აღნიშნული სახსრებით ფინანსდება საქართველოსთვის პრიორიტეტული ეკონომიკური და ტექნიკური თანამშრომლობის პროექტები, რომელთა შერჩევა მხარეებს შორის კონსულტაციების საფუძველზე ხდება.