თბილისი, 14 ივნისი — Sputnik. საყოველთაო ჯანდაცვის სახელმწიფო პროგრამის ფარგლებში მცხეთაში ახალი მრავალპროფილური კლინიკა გაიხსნა, ნათქვამია საქართველოს მთავრობის ვებ-გვერდზე.
ახალი 100-საწოლიანი, მრავალპროფილური კლინიკა „წმინდა მეფე მირიან და დედოფალ ნანას სახელობის მცხეთის სამედიცინო ცენტრი" საქართველოს პრემიერ-მინისტრმა გიორგი კვირიკაშვილმა, ჯანდაცვის მინისტრთან დავით სერგეენკოსთან და მცხეთის მაჟორიტარ დეპუტატთან დიმიტრი ხუნდაძესთან ერთად დაათვალიერა.
კლინიკა დაკომპლექტებულია წამყვანი სპეციალისტებით და აღჭურვილია თანამედროვე და ინოვაციური ტექნოლოგიებით. კლინიკაში დასაქმებულია 250-მდე ადამიანი. კლინიკაში მუშაობს 24-საათიანი გადაუდებელი სამედიცინო სამსახური, რეანიმაციისა და ინტენსიური თერაპიის განყოფილებები.
მცხეთის სამედიცინო ცენტრი საყოველთაო ჯანდაცვის პროგრამაშია ჩართული, რაც საშუალებას აძლევს პაციენტს, რეგიონიდან გაუსვლელად მიიღოს მაღალი ხარისხის სამედიცინო მომსახურება და ისარგებლოს უფასო და შეღავათიანი სამედიცინო სერვისით.
ახალი სამედიცინო დაწესებულება იფუნქციონირებს, როგორც მცხეთა-მთიანეთის რეგიონის სამხარეო საავადმყოფო.
ცენტრის მშენებლობისთვის 10 მილიონი ლარის ინვესტიცია განხორციელდა.
