თბილისი, 5 ივნისი — Sputnik. თბილისში გამართულმა მეათე საიუბილეო საერთაშორისო სტუდენტურმა კინოფესტივალმა „ამირანი" გამარჯვებულები დაასახელა, ნათქვამია ორგანიზატორების განცხადებაში.
კატეგორიაში „საუკეთესო ანიმაციური ფილმი" დასახელდა სლოვაკი რეჟისორის ევა სეკერესოვას ფილმი „მარწყვის დღეები" (Strawberry Days). ნომინაციაში „საუკეთესო დოკუმენტური სურათი" — ტამარა მამონის (ისრაელი) ფილმი „ტაიმორის შოუ" (Timor"s Show), ხოლო ნომინაციაში „საუკეთესო მხატვრული მოკლემეტრაჟიანი ფილმი" — არგენტინელი მალენა ვაინის ფილმი „ბიზნესი" (Business).
ფესტივალის სპეციალური პრიზი გადაეცა იტალიელ რეჟისორ სილვია პერას ფილმისათვის „ფანჯარა"(The Window).
ასევე გადაეცა სპეციალური დიპლომები ის სპეციალობებში, რომლებიც კინოსკოლებში ისწავლება. რეჟისურის სპეციალობაში მოიგო რეჟისორ ფრენსი ფაბრიტცმა ფილმით „სართული X" (Etage X), ხმის რეჟისურა — კაროლინა სპექტის ფილმი Beside Oneself, საოპერატორო ნამუშევარი — ჩინელი რეჟისორის მა ჩუანის ფილმი Malice Justice, მონტაჟი — ფინელი რეჟისორის ინკი ლახტის ფილმი After The Reunion, სცენარი — თედო დოლიძის ფილმი „დონორი".
კინოფესტივალის საკონკურსო პროგრამაში მოხვდა 38 სტუდენტური ნამუშევარი 19 სახელმწიფოდან: საქართველო, რუსეთი, აშშ, დიდი ბრიტანეთი, გერმანია, საფრანგეთი, იტალია, ფინეთი, პოლონეთი, პორტუგალია, ესპანეთი, რუმინეთი, სლოვაკეთი, ბელგია, არგენტინა, ბრაზილია, ისრაელი, ჩინეთი და სამხრეთ აფრიკა.
წელს ფესტივალის ჟიურის წევრები იყვნენ ინდოელი კინორეჟისორი, სცენარისტი და პედაგოგი აშვინ მალიქი; ისრაელის კინოინდუსტრიის აქტიური წევრი, პროდიუსერი ეითან ევანი; ლიტველი პროდიუსერი რამუნას პავილინსკასი; ირანელი კინემატოგრაფსტი, კარნამეს ხელოვნებისა და კულტურის ინსტიტუტის დამფუძნებელი და ბორდის წევრი ალირეზა სოლტანიში; თეატრისა და კინოს ქართველი მსახიობი ნინო კასრაძე.
სტუდენტური კინოფორუმის ორგანიზატორები წელს იყვნენ თეატრისა და კინოს სახელმწიფო უნივერსიტეტი, საქართველოს კულტურისა და ძეგლთა დაცვის სამინისტრო, საქართველოს კინემატოგრაფიის ეროვნული ცენტრი და თბილისის მერია.
კინოფესტივალი „ამირანი" გასული საუკუნის 80-იან წლებში დაარსდა. ფესტივალმა უამრავი ამჟამად გამოჩენილი რეჟისორი სტუდენტობის პერიოდში დააჯილდოვა. მრავალწლიანი ისტორიის მქონე ფესტივალი 2007 წელს აღადგინეს. ის მსოფლიო კინოპროცესის განვითარებასა და მხარდაჭერას განახლებული სახით შეუერთდა.
