თბილისი, 1 ივნისი — Sputnik. ახალგაზრდების დასაქმების ფორუმი თბილისში, კულტურის ცენტრ "ფაბრიკაში" 5 ივნისს გაიმართება, განაცხადეს ღონისძიების ორგანიზატორებმა.
ფორუმს, რომელიც 10:00-დან 15:00 საათამდე გაგრძელდება, ადგილობრივი და საერთაშორისო არასამთავრობო ორგანიზაციების, სახელმწიფო და ბიზნეს–სექტორის წარმომადგენლები და განათლების ექსპერტები დაესწრებიან.
საქართველოს მოსახლეობის 22,5%-ს 15-დან 29 წლამდე ასაკის ახალგაზრდები შეადგენენ, მათი ერთი მესამედი უმუშევარია, ხაზგასმით აღნიშნეს ფორუმის ორგანიზატორებმა.
პროექტი მიზნად ისახავს შეიქმნას ისეთი პლატფორმა დისკუსიისთვის, რომელიც სპეციალისტებს დაეხმარება შეაფასონ მიღწევები, რეალური გამოწვევები და შეიმუშაონ ახალგაზრდების დასაქმების პრობლემის გადაჭრის სტრატეგია.
ფორუმი ტარდება "სამეწარმეო უნარ-ჩვევების, დასაქმებისა და შემოსავლის გენერირების მხარდაჭერის პროგრამის" ფარგლებში, რომელსაც ახორციელებს არასამთავრობო ორგანიზაცია YES-Georgia, რომელიც საქართველოში ახალგაზრდების დასაქმების საკითხებით არის დაკავებული. ფორუმის ორგანიზატორები არიან აშშ-ის საერთაშორისო განვითარების სააგენტო (USAID) და არასამთავრობო ორგანიზაცია "კრისტალი".
პროგრამის ფარგლებში საქართველოს 21 ქალაქში ორი წლის განმავლობაში გადამზადდება 600 ახალგაზრდა და დაფინანსდება 30 ბიზნეს-ინიციატივა.
