თბილისი, 24 მაისი — Sputnik. საქართველოს კალათბურთის ნაკრების თავდამსხმელი თორნიკე შენგელია მადრიდის "რეალში" გადასვლასთან ახლოსაა, იუწყება გამოცემა eurohoops.net.
25 წლის კალათბურთელის კონტრაქტი "ბასკონიასთან", რომელშიც 2014 წლიდან გამოდის, ამ ზაფხულს იწურება. როგორც გამოცემა წერს, "რეალი" შენგელიასთან მოლაპარაკებებს უკვე აწარმოებს და შეიძლება ფორვარდს ორწლიანი შეთანხმება შესთავაზოს.
შენგელია მადრიდულ კლუბში, სავარაუდოდ, გუნდის ვეტერანს, 37 წლის ანდრეს ნოსიონის შეცვლის, რომელმაც განაცხადა, რომ სეზონის დამთავრების შემდეგ პროფესიულ კარიერას დაასრულებს.
შენგელიას "რეალში" გადასვლის საბოლოო გადაწყვეტილებას ესპანეთის საკალათბურთო ჩემპიონატის დასრულების შემდეგ მიიღებენ.
შენგელია ჯერ კიდევ 17 წლისა ესპანურ "ვალენსიას" შეუერთდა. მის შემადგენლობაში ორი სეზონი ითამაშა. შემდეგ ორი წელი ბელგიაში დაჰყო, რომელსაც აშშ მოჰყვა, სადაც "ბრუკლინ ნეტსის", "სპრინგფილს არმორისა" და "ჩიკაგო ბულზის" შემადგენლობაში გამოდიოდა.
ამჟამინდელ სეზონში შენგელია საშუალოდ 11,7 ქულას და 7,6 მოხსნას აგროვებს.
