თბილისი, 23 მაისი — Sputnik. საქართველოს პრემიერ-მინისტრმა გიორგი კვირიკაშვილმა მწუხარება გამოხატა მანჩესტერში სტადიონზე მომხდარი აფეთქების გამო, სადაც ორშაბათს არიან გრანდის კონცერტი იმართებოდა.
მწუხარებას გამოვთქვამ ინგლისში, მანჩესტერში მომხდარი ტრაგედიის გამო. ტერაქტს, სულ მცირე, 19 ადამიანი ემსხვერპლა. არიან დაჭრილები.
გამოვთქვამ რწმენას, რომ ცივილიზებული მსოფლიო სულ უფრო მეტად გაააქტიურებს მოქმედებას ტერორიზმის წინააღმდეგ და ჩვენ, საერთო ძალებით, მივაღწევთ მშვიდობას მთელ მსოფლიოში.
პოლიციის ინფორმაციით, აფეთქება თვითმკვლელმა-ტერორისტმა განახორციელა. დაიღუპა 22 ადამიანი, მათ შორის, ბავშვები. სხეულის დაზიანება 59-მა ადამიანმა მიიღო.
„საქართველოს მთავრობისა და ქართველი ხალხის სახელით გულწრფელ თანაგრძნობას ვუცხადებ დიდი ბრიტანეთის მთავრობას, ინგლისელ ხალხს. ჩვენ მთელი გულით ვდგავართ მათ გვერდით ამ განსაცდელის დროს", — ნათქვამია კვირიკაშვილის სამძიმრის წერილში.
სამაშველო სამსახურში პირველი ზარი „მანჩესტერ არენას“ სტადიონზე არიან გრანდეს კონცერტის მსმენელისგან 22:35 საათზე (თბილისის დროით 00:35 სთ) შევიდა, მოგვიანებით კი თვითმხილველებმა სოციალურ ქსელში გაავრცელეს ინფორმაცია, რომ სტადიონზე „აფეთქების მსგავსი ხმები“ შემოესმათ. გარდა ამისა, პოლიციამ განაცხადა, რომ აფეთქება თვითმკვლელმა-ტერორისტმა განახორციელა.
ტრაგედია მანჩესტერში — ბრიტანეთში ყველაზე დიდი ტერორისტული შეტევაა 2005 წელს ლონდონის მეტროში მომხდარი ტრაგედიის შემდეგ, რამაც 50 ადამიანის სიცოცხლე იმსხვერპლა.
