თბილისი, 16 მაისი — Sputnik. გურჯაანის მუნიციპალიტეტის გამგეობის ჩინოვნიკი გიორგი მათიაშვილი დაკავებულია ქრთამის აღების ფაქტზე ყოფილი ბიოლაბორატორიის შენობის რეალურ ფასზე ნაკლებ თანხად გაყიდვის მცდელობის გამო, ნათქვამია საქართველოს სახელმწიფო უსაფრთხოების სამსახურის ვებ-გვერდზე გამოქვეყნებულ განცხადებაში.
გამოძიებამ დაადგინა, რომ მათიაშვილი ერთ-ერთ მოქალაქეს გურჯაანის მუნიციპალიტეტის სოფელ ახაშენში მდებარე ყოფილი ბიოლაბორატორიის შენობის რეალურ ფასზე ნაკლებ თანხად შეფასებას, შემდგომ აუქციონზე გატანას და გამარჯვებაში დახმარებას დაპირდა.
ამის სანაცვლოდ მათიაშვილმა დაინტერესებულ პირს ქრთამის სახით მოსთხოვა 35 000 ლარი, საიდანაც 5000 ლარი წინასწარ აიღო. სამართალდამცველებმა ჩინოვნიკი ქრთამის აღების მომენტში დააკავეს. თანხა ამოღებულია ნივთმტკიცების სახით.
მათიაშვილი გურჯაანის მუნიციპალიტეტის გამგეობაში ქონების მართვის, ეკონომიკური განვითარების დაგეგმვისა და სტატისტიკის განყოფილების მთავარი სპეციალისტის თანამდებობას იკავებდა.
გამოძიება განსაკუთრებით დიდი ოდენობით ქრთამის მოთხოვნისა და აღების ფაქტზე მიმდინარეობს (საქართველოს სსკ-ის 338-ე მუხლის მე-3 ნაწილის "ე" ქვეპუნქტით), რაც სასჯელის სახით 11-დან 15 წლამდე ვადით თავისუფლების აღკვეთას ითვალისწინებს.
გამოძიებას საქართველოს სახელმწიფო უსაფრთხოების სამსახურის ანტიკორუფციული სააგენტო აწარმოებს.
