თბილისი, 16 მაისი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა დიდი ოდენობით უაქციზო სიგარეტის უკანონო შენახვის, გადაზიდვისა და რეალიზაციის ბრალდებით ორი ადამიანი დააკავეს, აღნიშნულია უწყების ვებ-გვერდზე გამოქვეყნებულ განცხადებაში.
გამოძიების ინფორმაციით, ერთ-ერთი ბრალდებული წყალტუბოს რაიონში, საკუთარი საცხოვრებელი სახლის სხვენში ინახავდა უაქციზო სიგარეტს — 29 239 კოლოფ Master-ს, რომლის ნაწილიც — 7 500 კოლოფი მეორე ბრალდებულს მიჰყიდა.
რეალიზატორი დააკავეს პროდუქციის გადაზიდვის მომენტში, ხოლო დანარჩენი უაქციზო სიგარეტი საცხოვრებელი სახლის ჩხრეკის შედეგად ამოიღეს.
სისხლის სამართლის საქმე აღძრულია სსკ-ის მუხლით "მარკირებას დაქვემდებარებული აქციზური საქონლის აქციზური მარკის გარეშე გამოშვება, შენახვა, რეალიზაცია ან გადაზიდვა განსაკუთრებითი დიდი ოდენობით", რაც ისჯება ექვსიდან რვა წლამდე პატიმრობით.
საქართველოში თამბაქოს შემოტანაზე აქციზი 2017 წლის იანვრიდან გაიზარდა.
