თბილისი, 15 მაისი — Sputnik. ევროპის მაუწყებელთა კავშირმა (EBU) საბავშვო "ევროვიზიის" მონაწილეებს ნება დართო, სიმღერების 40%-მდე მათთვის უცხო ენაზე იმღერონ, იუწყება „Sputnik-ბელარუსი" EBU-ს წარმომადგენელზე დაყრდნობით.
მორიგი საბავშვო „ევროვიზია" თბილისში 26 ნოემბერს გაიმართება. წინა კონკურსზე ქართველმა მონაწილემ მარიამ მამადაშვილმა გაიმარჯვა.
როგორც EBU-ს წარმომადგენლები იუწყებიან, საბავშვო კონკურსის წესები გასულ წელს მნიშვნელოვნად შეიცვალა, წელს კი ორგანიზატორები კონკურსის ჩატარებას პრაქტიკულად ცვლილებების გარეშე აპირებენ.
„ადრე ჩვენ ნებას ვრთავდით სიმღერების მხოლოდ 25% ემღერათ მათთვის უცხო ენაზე, ახლა კი ეს რაოდენობა 40%-მდე გაიზარდა", — განმარტა EBU-ს წარმომადგენელმა.
პარასკევს ასევე წარმოდგენილი იყო წლევანდელი საბავშვო "ევროვიზიის" დიზაინი და სლოგანი — "ანათე".
როგორც ქართული ტელევიზიის წარმომადგენლებმა ჟურნალისტებს განუცხადეს, ქვეყანას კონკურსში გამარჯვების იმედი აქვს 2017 წელსაც – საკუთარ მოედანზე. მასში მონაწილეობას 14 შემსრულებელი და ჯგუფი მიიღებს.
