თბილისი, 10 მაისი — Sputnik. ოთხშაბათს იაპონიის ქალაქ კიოტოში ჯგუფური ეტაპის რაგბის მსოფლიო ჩემპიონატის წილისყრა შედგა, რომელიც იაპონიაში 2019 წელს გაიმართება, იუწყება რაგბის საერთაშორისო საბჭოს (IRB) ოფიციალური ვებ-გვერდი.
წილისყრის შედეგების მიხედვით, საქართველოს ნაკრები D ჯგუფში აღმოჩნდა. გამოვლინდა მისი პირველი ორი მეტოქის ვინაობა — ეს არის ავსტრალიისა და უელსის გუნდები.
კიდევ ორი ნაკრების ვინაობა, რომელიც D ჯგუფს შეავსებს, ცნობილი მას შემდეგ გახდება, რაც ყველა კონტინენტზე საკვალიფიკაციო ეტაპები დასრულდება. ეს იქნება ოკეანიის პირველი გუნდი და ამერიკის მეორე გუნდი.
2015 წლის მსოფლიო ჩემპიონატზე საქართველოს ნაკრებმა ჯგუფურ სტადიაზე ორი გამარჯვება მოიპოვა — ტონგასთან (17:10) და ნამიბიასთან (17:16), ჯგუფში მესამე ადგილი დაიკავა და ისტორიაში პირველად, 2019 წლის მსოფლიო ჩემპიონატზე, კვალიფიკაცია ავტომატურად მოიპოვა.
2019 წლის რაგბის მსოფლიო ჩემპიონატის წილისყრის შედეგები:
А ჯგუფი: ირლანდია, შოტლანდია, იაპონია, ევროპის პირველი გუნდი, ფლეი-ოფის გამარჯვებული.
В ჯგუფი: ახალი ზელანდია, სამხრეთ აფრიკა, იტალია, აფრიკის პირველი გუნდი, სანუგეშო ფინალის გამარჯვებული.
С ჯგუფი: ინგლისი, საფრანგეთი, არგენტინა, ამერიკის პირველი გუნდი, ოკეანიის მეორე გუნდი.
D ჯგუფი: ავსტრალია, უელსი, საქართველო, ოკეანიის პირველი გუნდი, ამერიკის მეორე გუნდი.
2019 წლის რაგბის მსოფლიო ჩემპიონატი იაპონიაში 20 სექტემბერს დაიწყება და 2 ნოემბერს დასრულდება. რაგბის ისტორიაში ეს პირველი ჩემპიონატი იქნება, რომელიც აზიაში გაიმართება.
მსოფლიოს მოქმედი ჩემპიონი ახალი ზელანდიის ნაკრებია.
