თბილისი, 10 მაისი — Sputnik. თბილისის მეტროპოლიტენის სადგურ "წერეთლის" მუშაობა ჩვეულებრივ რეჟიმში აღდგა. ის დროებით, ესკალატორებზე დაკვამლიანების გამო დაკეტილი იყო, ნათქვამია "თბილისის სატრანსპორტო კომპანიის" Facebook-გვერდზე გამოქვეყნებულ განცხადებაში.
კომპანიის ინფორმაციით, დილის 10:00 საათზე ესკალატორების ქვემოთ განთავსებულ კაბელებზე მცირედი დაკვამლიანების გამო, დროებით შეიზღუდა მგზავრების მიღება.
„თბილისის სატრანსპორტო კომპანიის შესაბამისმა სამსახურებმა ხარვეზის აღმოფხვრა დროულად მოახერხეს, ასევე დეტალურად შეამოწმეს ესკალატორის ქვემოთ არსებული ინფრასტრუქტურა. წერეთლის სადგურზე მგზავრების გადაადგილება სრულიად უსაფრთხოა", — აღნიშნულია განცხადებაში.
სანამ სადგური „წერეთელი" დაკეტილი იყო, სხვა სადგურები მგზავრებს შეუფერხებლად ემსახურებოდნენ.
მეტროპოლიტენი დედაქალაქის ერთ-ერთი მთავარი სატრანსპორტო არტერიაა.
ქალაქის ერთი ბოლოდან მეორეში გასვლა მეტროპოლიტენით 40 წუთშია შესაძლებელი. ამჟამად თბილისის მეტროპოლიტენი 22 სადგურს ითვლის, რომლებიც ორ ხაზზეა განლაგებული — ახმეტელი-ვარკეთილის და საბურთალოს. მეტროპოლიტენის ხაზების საერთო სიგრძე 53,7 კილომეტრია.
