თბილისი, 4 მაისი — Sputnik. ქართველი კინემატოგრაფისტები ვისბადენში (გერმანია) ცენტრალური და აღმოსავლეთ ევროპის საერთაშორისო კინოფესტივალის goEast პრიზიორები გახდნენ. ფესტივალი 26 აპრილიდან — 2 მაისის ჩათვლით ჩატარდა.
როგორც საქართველოს კინემატოგრაფიის ეროვნულ ცენტრში აცხადებენ, ნანა ექვთიმიშვილსა და სიმონ გროსს პრიზი საუკეთესო რეჟისურისთვის გადაეცათ ფილმისთვის "ჩემი ბედნიერი ოჯახი".
ფილმი ასევე დაჯილდოვდა კინოკრიტიკოსთა საერთაშორისო ფედერაციის ჯილდოთი „ფიპრესი".
ფესტივალის ერთ-ერთი რჩეული გახდა კიდევ ერთი ქართული ფილმი „მზის ქალაქი". რატი ონელის დოკუმენტურ ნამუშევარს კულტურული მრავალფეროვნების ფედერალური უწყების პრიზი გადასცეს.
კინოფესტივალზე goEast ასევე აჩვენეს სამი თაობის ქართველი რეჟისორი ქალების ნამუშევრები: პირველი რეჟისორი-ქალის ნუცა ღოღობერიძის „ბუბა", მისი ქალიშვილის, ლანა ღოღობერიძის „რამდენიმე ინტერვიუ პირად საკითხებზე" და ლანას ქალიშვილის, ნუცა ალექსი-მესხიშვილის „ბედნიერება".
გარდა ამისა, ქართველი კინემატოგრაფისტები მონაწილეობდნენ კინოფესტივალ goEast-ის სხვა სექციურ ღონისძიებებში. რეჟისორი ელენე მიქაბერიძე თავისი კინოპროექტით „სასაზღვრო თამაშები" მონაწილებდა სემინარში Young Filmmakers for Peace.
სოსო (იოსებ) ბლიაძის მოკლემეტრაჟიანი ფილმი „სერიოზული ადამიანი" მოხვდა პროგრამაში East-West Talant Lab, რომელიც ცოდნისა და შემოქმედებითი იდეების ურთიერთგაზიარების კინემატოგრაფიულ ადგილს წარმოადგენს.
კინოფესტივალი goEast 2001 წელს გერმანული კინოინსტიტუტის (DIF) დირექტორმა კლაუდია დილმანმა დააარსა. პირველი ფესტივალის კატალოგის წინასიტყვაობაში მან დაწერა: „დროა, გავიხსნათ ჩვენი აღმოსავლეთ მეზობლების აზრების, სახეების, მითებისა და ისტორიებისთვის".
ქართველი რეჟისორების ფილმები goEast-ის პრიზიორები არაერთხელ გამხდარა. მაგალითად, 2013 წელს გაიმარჯვა ნანა ექვთიმიშვილისა და სიმონ გროსის ფილმმა „გრძელი ნათელი დღეები", 2010 წელს ლევან კოღუაშვილის ფილმმა „ქუჩის დღეები", 2009 წელს — გიორგი ოვაშვილის ფილმმა „გაღმა ნაპირი", ხოლო 2006 წელს — ლევან ზაქარეიშვილის სურათმა „თბილისი-თბილისი".
