თბილისი, 4 მაისი — Sputnik. თავისუფალი სტილის ქართველმა მოჭიდავეებმა ზურაბ იაკობაშვილი (-65 კგ) და ელიზბარ ოდიკაძე (-97 კგ) სერბეთის ქალაქ ნოვი-სადში ევროპის ჩემპიონატის ბრინჯაოს პრიზიორები გახდნენ, იუწყება ოფიციალური ვე-ბგვერდი UWW.
მესამე ადგილისათვის პაექრობაში იაკობაშვილმა აზერბაიჯანელ მაგომედ გაჯიევს ანგარიშით 9:4 სძლია, ოდიკაძემ კი მაკედონიის სახელით მოასპარეზე მაგომედჰაჯი ნუროვს არცერთი შანსი არ დაუტოვა და ანგარიშით 10:0 მოუგო.
ხუთშაბათს ტურნირზე მედლები 61 და 74 კილოგრამამდე წონით კატეგორიაში გათამაშდება. პირველ კატეგორიაში საქართველოს რიო-დე-ჟანეიროს ოლიმპიური ჩემპიონი, მსოფლიოს და ევროპის მოქმედი ჩემპიონი ვლადიმერ ხინჩეგაშვილი წარმოადგენს, მეორეში კი — ავთანდილ კენჭაძე.