თბილისი, 2 მაისი — Sputnik. საქართველოს 2017 წლის იანვრიდან აპრილის ჩათვლით დაახლოებით 1,8 მლნ უცხოელი ეწვია, რაც გასული წლის მონაცემებზე 11,1%-ით მეტია, აღნიშნულია შინაგან საქმეთა სამინისტროს ვებ-გვერდზე განთავსებულ განცხადებაში.
ვიზიტორების საერთო რაოდენობიდან ტურისტი იყო 736,3 ათასი ადამიანი, რაც 2016 წლის მონაცემებზე 26,9%-ით მეტია.
მხოლოდ აპრილში საქართველოში იმყოფებოდა 510,6 ათასი უცხოელი (+10,2%). აქედან ტურისტი იყო 222,6 ათასი ადამიანი (+29,7%), ტრანზიტული მოგზაური — 107,8 ათასზე მეტი (+0,3%).
2017 წლის აპრილში ყველაზე მეტი ვიზიტი განხორციელდა სომხეთიდან (+13,2%), აზერბაიჯანიდან (+7,1%), თურქეთიდან (-19,2%), რუსეთიდან (+16,5%), უკრაინიდან (+27,2%) და ირანიდან (+183,9%).
ასევე პოზიტიური ტენდენციაა შენარჩუნებული ევროკავშირის ქვეყნებიდან — წლის დასაწყისიდან ყველაზე მეტი ვიზიტორი საქართველოს ეწვია გერმანიიდან, პოლონეთიდან, საფრანგეთიდან, დიდი ბრიტანეთიდან, ლიტვიდან და ბულგარეთიდან; შუა აზიის ქვეყნებიდან — ყაზახეთიდან, უზბეკეთიდან, თურქმენეთიდან; აღმოსავლეთ ევროპის ქვეყნებიდან ლიდერობენ ბელორუსია და მოლდოვა.
