თბილისი, 2 მაისი — Sputnik. საქართველოს მშვილდოსან ქალთა ნაკრებმა ხათუნა ნარიმანიძის, ქრისტინა ესებუას და ნანა მახარაძის შემადგენლობით პოლონეთის ქალაქ ლეგნიცაში ევროპის გრან-პრის პირველ ეტაპზე ოქროს მედლები მოიპოვეს, ნათქვამია ტურნირის ოფიციალურ ვებ-გვერდზე გამოქვეყნებულ განცხადებაში.
ქართველმა სპორტსმენმა ქალებმა რუსეთის გუნდს მოუგეს ანგარიშით 6:0.
რაც შეეხება საქართველოს ვაჟთა ნაკრებს, შემაჯამებელ ოქმში მან მეოთხე ადგილი დაიკავა. ნახევარფინალში ქართველმა მშვილდოსანმა ვაჟებმა უკრაინის გუნდს დაუთმეს ანგარიშით 0:6, ხოლო მესამე ადგილისათვის ბრძოლაში ასეთივე ანგარიშით იტალიელებთან წააგეს.
ევროპის მშვილდოსნობის გრან-პრის მეორე ეტაპი ბუდაპეშტში 16-21 მაისს გაიმართება.
