თბილისი, 2 მაისი — Sputnik. ამერიკული ჟურნალი Esquire-ის მაისის ნომრის ვერსიით, ქართული ღვინო „თავკვერი" მსოფლიოს იმ ნატურალური საუკეთესო ღვინოების ათეულშია, რომელთა ღირებულება 40 აშშ დოლარს არ აღემატება.
ჟურნალმა შეაფასა „ხოხბის ცრემლების" მარნის წითელი მშრალი ღვინო „თავკვერი" (2013 წლის მოსავალი). ღვინის სიმაგრეა 12%. ამ სახეობის ღვინოს აწარმოებენ ამავე დასახელების ყურძნის ჯიშისგან, რომელიც შიდა ქართლში გვხვდება.
„მსუბუქი წითელი „თავკვერი" თიხის ჭურჭელშია დამზადებული, რომელსაც ფუტკრის ცვილით ფარავენ და მიწაში დებენ", — წერს გამოცემა.
ამჟამად საქართველოში ასობით ჯიშის ყურძენი მოდის, მსოფლიოში ცნობილი 4 ათასი სახეობიდან დაახლოებით 500 სახეობას ქართული ფესვები აქვს. იუნესკოს გადაწყვეტილებით, 2013 წელს ღვინის ქვევრში დაყენების ხერხი კაცობრიობის არამატერიალური კულტურული მემკვიდრეობის ნუსხაში შევიდა.
ქართული ღვინის გარდა, ჟურნალის სიაში შევიდა ნატურალური ღვინოები საფრანგეთიდან, ესპანეთიდან, ავსტრიიდან, ავსტრალიიდან, იტალიიდან და აშშ-დან.
მსოფლიოში ქართული ღვინის პოპულარობა იზრდება. საქართველომ 2017 წლის იანვარ-მარტში დაახლოებით 14,2 მლნ ბოთლი (0,75 ლ) გაიტანა ექსპორტზე, რაც გასული წლის ანალოგიური პერიოდის მაჩვენებელზე 85%-ით მეტია.
ამ პერიოდში საქართველომ გაიტანა 32,2 მლნ აშშ დოლარის ღირებულების ღვინო მსოფლიოს 38 ქვეყანაში, რაც 2016 წლის ანალოგიურ პერიოდთან შედარებით 77%-ით მეტია.
ქართული ღვინის ძირითადი ექსპორტიორი ქვეყნებია რუსეთი, ჩინეთი, უკრაინა, პოლონეთი და ყაზახეთი.
