თბილისი, 1 მაისი — Sputnik. საქართველოს საყოველთაო ჯანდაცვის განახლებული პროგრამა ქვეყნის ყველა მოქალაქის ინტერესებს ითვალისწინებს, განაცხადა საქართველოს შრომის, ჯანმრთელობისა და სოციალური დაცვის მინისტრმა დავით სერგეენკომ.
ცვლილებების თანახმად, რომლებიც ძალაში 1 მაისს შევიდა, საქართველოს მოქალაქეები სახელმწიფო დაზღვევით შემოსავლის დონიდან გამომდინარე ისარგებლებენ.
„მოქალაქეთა არც ერთი კატეგორია გამოტოვებული არ იქნება. ამ ცვლილებათა მომზადებას წელიწადნახევარი მივუძღვენით და ყველაფერი ძალიან დეტალურად გავაანალიზეთ", — განაცხადა სერგეენკომ.
საქართველოს იმ მოქალაქეებს, რომლებიც საყოველთაო ჯანდაცვის პროგრამაში დარეგისტრირებული არ არიან, რეგისტრაციის გავლა სპეციალიზებულ ოფისებში შეუძლიათ, პაციენტები სამედიცინო მომსახურებით სარგებლობას 24 საათის განმავლობაში შეძლებენ, აღნიშნა მინისტრმა.
განახლებული პროგრამის ერთ-ერთი ყველაზე მნიშვნელოვანი კომპონენტია — კონკრეტულად იმ კლინიკის არჩევის შესაძლებლობა, რომელშიც სახელმწიფო დაზღვევის მქონე პაციენტს გარკვეული სამედიცინო მომსახურების მიღება სურს, ხაზგასმით აღნიშნა სერგეენკომ.
მინისტრი ასევე შეეხო უფასო მედიკამენტების თემას, რომლებსაც ზაფხულიდან ყოველთვიურად უფასოდ მიიღებს საქართველოს მოქალაქეთა რამდენიმე კატეგორია — ეს დაახლოებით 600000 საქართველოს მოქალაქეა, რომლებიც სოციალურად დაუცველ ჯგუფებს განეკუთვნებიან, ან ქრონიკული დაავადებების მქონე მარტოხელა პენსიონერები არიან.
საყოველთაო ჯანდაცვის პროგრამა ექვს ჯგუფს მოიცავს: მიზნობრივი ჯგუფები (5 წლამდე ბავშვები, პენსიონერები, შშმ პირები, პედაგოგები და სოციალურად დაუცველი პირები), მაღალი შემოსავლების მქონე მოქალაქეები, საშუალო შემოსავლის მქონე პირები, 70000-დან 100000-მდე სარეიტინგო ქულის მქონე მოქალაქეები, მოზარდები (6-დან 18 წლამდე) და დაბალი, არარეგულარული შემოსავლის მქონე მოქალაქეები.
