თბილისი, 24 აპრილი — Sputnik. თბილისის საერთაშორისო აეროპორტი ჩვეულ რეჟიმში მუშაობს, აცნობეს „Sputnik-საქართველოს" აეროპორტის პრეს-სამსახურში.
გუშინ, ღამით ძლიერი ქარის გამო სტამბული-თბილისის ავიარეისი გაუქმდა. ქარის სიჩქარე წამში 30 მეტრს აღწევდა.
„დაშვების ადგილი ძლიერი ქარის გამო შეიცვალა. ავიაკომპანიამ მგზავრების თბილისში ჩამოყვანაზე იზრუნა. ყველა სხვა რეისი გეგმის მიხედვით განხორციელდა", — განაცხადა სააგენტოს თანამოსაუბრემ.
საქართველოში ამინდი შაბათს საგრძნობლად გაუარესდა. სტიქიამ დააზიანა შენობები, წააქცია ხეები, დასავლეთ საქართველოში მოსახლეობის ნაწილი ელექტროენერგიის გარეშე დარჩა. ხელისუფლება ზარალს ითვლის.