თბილისი, 20 აპრილი — Sputnik. უკრაინა და ირანი საქართველოსა და აზერბაიჯანის ტერიტორიის გავლით სატესტო მატარებლის გაშვებაზე შეთანხმდნენ, მატარებელი სოფლის მეურნეობის პროდუქციას გადაზიდავს, აღნიშნულია უკრაინის ინფრასტრუქტურის სამინისტროს Facebook–გვერდზე განთავსებულ განცხადებაში.
პირველ რიგში, საუბარია უკრაინიდან ირანში მარცვლეულის ტრანსპორტირებაზე, განაცხადა უკრაინის ინფრასტრუქტურის მინისტრმა ვლადიმირ ომელიანმა ირანის დელეგაციასთან შეხვედრის შემდეგ.
უკრაინა–ირანის სატესტო მატარებელი შეიძლება უკვე 2017 წლის ზაფხულში გაუშვან.
"ეს ორივე ქვეყნისთვის თანამშრომლობის განსაკუთრებულად პერსპექტიული მიმართულებაა. უკრაინამ ახალი საერთაშორისო სატრანსპორტო დერეფნები უნდა შეიმუშაოს, რათა ევროპის, აზიისა და აღმოსავლეთის ქვეყნებს შორის საიმედო სატრანზიტო ხიდი გახდეს", – განაცხადა ომელიანმა.
მან ირანის წარმომადგენლებს ასევე მოუწოდა, განიხილონ ირანული ნავთობისა და ბუნებრივი აირის უკრაინაში ტრანსპორტირების შესაძლებლობა, ასევე ქვეყნის ტერიტორიაზე ნავთობგადამამუშავებელი ქარხნის მშენებლობის პერსპექტივები.
მხარეებმა ასევე განიხილეს თანამშრომლობა საზღვაო და საავტომობილო ტრანსპორტის სფეროში, ცალკე გამოყვეს საავიაციო სფეროში თანამშრომლობის გაძლიერების საკითხები.
