თბილისი, 20 აპრილი — Sputnik. ხუთშაბათს სპორტისა და ახალგაზრდობის საქმეთა მინისტრ ტარიელ ხეჩიკაშვილის, ევროპის სუმოს ფედერაციის პრეზიდენტ დარიუშ როზუმისა და გენერალურ მდივან რიხო რანიკის შეხვედრაზე განიხილეს თბილისის მზაობა სუმოისტთა ევროპის ჩემპიონატისთვის, ნათქვამია სპორტისა და ახალგაზრდობის საქმეთა სამინისტროს ოფიციალურ ვებ–გვერდზე გამოქვეყნებულ განცხადებაში.
ევროპის ჩემპიონატი Check in Georgia-ს ფარგლებში თბილისში 22 და 23 აპრილს ჩატარდება.
შეხვედრის შემდეგ სტუმრებმა მოინახულეს ქართული სპორტის მუზეუმი, სადაც დაცულია ქართველი სუმოისტების მიერ სხვადასხვა საერთაშორისო ტურნირებზე მოპოვებული მედლები და თასები.
აღსანიშნავია, რომ სხვადასხვა ასაკობრივ კატეგორიებში ქართველ სუმოისტებს ამ დრომდე მსოფლიოსა და ევროპის ჩემპიონატებზე მოპოვებული აქვთ 156 მედალი.
2017 წლის ევროპის ჩემპიონატში 13 ქვეყნიდან სამი ასაკობრივი კატეგორიის 290 სპორტსმენი იასპარეზებს.
პირველ დღეს, 22 აპრილს მედლები ორ ასაკობრივ კატეგორიაში – 21 და 23-წლამდელთა შორის გათამაშდება.
23 აპრილს გამოვლინდებიან გამარჯვებულები უფროსებში, ასევე გუნდურ პირველობაში მამაკაცებსა და ქალებს შორის.
საქართველოს ნაკრები ევროპის ჩემპიონატზე 14 სუმოისტით წარსდგება.
