თბილისი, 18 აპრილი – Sputnik. ნაძალადევის რაიონში თბილისის მერიის მხარდაჭერით, მიკროავტობუსების განრიგის მობილური პროგრამა შეიქმნება, რომელიც სტუდენტური კონკურსის გამარჯვებული პროექტია.
სტუდენტური კონკურსის „გახადე შენი ქალაქი უკეთესი“ ფინალური პრეზენტაცია თბილისში, პარლამენტში გაიმართა. საუკეთესო პროექტად დასახელდა ქრისტინა კირაკოსიანის პროექტი, რომელიც სამარშრუტო მიკროავტობუსების განრიგისა და მათი გადაადგილების შესახებ მობილური პროგრამის შექმნას ითვალისწინებს.
კონკურსის ჩატარების იდეა ეკუთვნის პარლამენტის დეპუტატს ნაძალადევის საარჩევნო ოლქიდან სოფო კილაძეს.
„დარწმუნებული ვარ, რომ ეს პროექტი ორმხრივად სასარგებლო შედეგს გამოიღებს, როგორც ჩვენი ოლქისთვის, ასევე მასში მონაწილე სტუდენტებისთვის“, – განაცხადა კილაძემ.
პროექტი ორ ეტაპად გაიმართა. პირველ ეტაპზე კანდიდატებმა საკუთარი იდეები გრიგოლ რობაქიძის სახელობის უნივერსიტეტში წარადგინეს, ხოლო საუკეთესო იდეების ავტორებმა პრეზენტაცია ჟიურის წევრებისა და აუდიტორიის წინაშე საქართველოს პარლამენტში გამართეს.
