თბილისი, 13 აპრილი — Sputnik. ბათუმში ორი დღის განმავლობაში მუნიციპალური ტრანსპორტი მგზავრებს ქალაქის სასაფლაოზე უფასოდ მიიყვანს, აღნიშნულია მერიის პრეს-სამსახურის განცხადებაში.
ეს გადაწყვეტილება ქალაქის ხელისუფლებამ აღდგომის ბრწყინვალე დღესასწაულთან დაკავშირებით მიიღო. უფასო ავტობუსები 16 და 17 აპრილს 07:00 საათიდან 23:00 საათამდე იმოძრავებს.
"№11 ავტობუსი, ყოველ 12 წუთში, სავაჭრო ცენტრ "ბათუმიდან" ფერიის სასაფლაომდე იმოძრავებს", — ნათქვამია განცხადებაში.
ბათუმის გარდა, უფასო ავტობუსების მოძრაობის გადაწყვეტილება მიიღო თბილისის მერიამაც. 16 და 17 აპრილს სასაფლაოების მიმართულებით ავტობუსები 08:00-დან 20:00-მდე უფასოდ იმოძრავებს.
გარდა ამისა, აღდგომის დღესასწაულთან დაკავშირებით 15 აპრილს მეტროს მუშაობა 00:00 საათიდან 16 აპრილის დილის 04:00 საათამდე გახანგრძლივდება და 23:00 საათიდან მეტროპოლიტენი მგზავრებს უფასოდ მოემსახურება.
მართლმადიდებლური სამყარო აღდგომის ბრწყინვალე დღესასწაულს წელს 16 აპრილს აღნიშნავს. აღდგომის მეორე დღეს, ორშაბათს, ტრადიციულად საქართველოს მოქალაქეები სასაფლაოზე გადიან და ახლობლებსა და ნათესავებს იხსენებენ.
