თბილისი, 12 აპრილი — Sputnik. დედაენის დღესთან დაკავშირებით, რომელიც საქართველოში 14 აპრილს აღინიშნება, კულტურულ-გასართობი ფესტივალი დაიწყო.
ქართული ენა საქართველოში სახელმწიფო ენას წარმოადგენს, მასზე მსოფლიოში 4 მილიონზე მეტი ადამიანი საუბრობს.
ფესტივალი საქართველოს პარლამენტის ეროვნულ ბიბლიოთეკაში ერთდღიანი გამოფენით დაიწყო, სადაც "დედაენის" 20-ზე მეტი უნიკალური გამოცემაა წარმოდგენილი.
ფესტივალის ფარგლებში, რომელიც 5 მაისამდე გაგრძელდება, საქართველოს 1500 სკოლაში მხიარული თავისუფალი გაკვეთილები ჩატარდება, რომლებსაც ივანე ჯავახიშვილის სახელობის თბილისის სახელმწიფო უნივერსიტეტისა და საქართველოს სხვა უმაღლესი სასწავლო დაწესებულების სტუდენტები ჩაატარებენ.
სტუდენტები, რომლებსაც ქართული ენის კეთილი ელჩები ეწოდათ, მოსწავლეებს გაკვეთილებზე აჩვენებენ, თანამედროვე ცხოვრებაში როგორ მახინჯდება ქართული ენა. გაკვეთილები ზღაპრის სტილში წარიმართება, რომლის მთავარი გმირი ქართული ენა იქნება.
ფესტივალის მიზანია გასაგებ და მხიარულ ფორმაში მოსწავლეებისთვის ქართული ენის ისტორიის მიწოდება.
ფესტივალის ორგანიზატორია საგანმანათლებლო ცენტრი "ცამდე".