თბილისი, 10 აპრილი — Sputnik. ბაქო-თბილისი-ყარსის სარკინიგზო დერეფნის ექსპლუატაციაში გადაცემა მიმდინარე წლის ივნისშია დაგეგმილი, იუწყება „Sputnik–აზერბაიჯანი" თურქეთის ტრანსპორტის, ნაოსნობისა და კომუნიკაციების მინისტრ აჰმეთ არსლანზე დაყრდნობით.
როგორც არსლანმა აღნიშნა, ბაქო-თბილისი-ყარსის რკინიგზა წვლილს შეიტანს თურქეთის აღმოსავლეთ პროვინციების განვითარებაში. „თურქი მწარმოებლების პროდუქცია მსოფლიოს სხვადასხვა ქვეყანას ყარსის ლოგისტიკური ცენტრის მეშვეობით მიეწოდება, რაც შეამცირებს ვადებს და მიწოდების თვითღირებულებას", — ციტირებს მინისტრის სიტყვებს სააგენტო Anadolu.
პროექტის დეტალებთან დაკავშირებით მინისტრმა განაცხადა, რომ ყარსიდან ბაქომდე იმოქმედებს ერთი სარკინიგზო შტო, შემდეგ მიმოსვლა გაგრძელდება ყაზახეთისა და თურქმენეთის გავლით ჩინეთამდე. „საუბარია რკინიგზით სერიოზული მოცულობის მიწოდებაზე", — თქვა არსლანმა.
ბაქო-თბილისი-ყარსის რკინიგზა აზერბაიჯანი-საქართველო-თურქეთის სახელმწიფოთაშორისი ხელშეკრულების საფუძველზე შენდება. პროექტის რეალიზება 2008 წელს დაიწყო. პროექტის ფარგლებში თურქეთის ტერიტორიაზე შენდება სარკინიგზო ხაზი საქართველოში ახალქალაქიდან თურქეთში ყარსის რკინიგზის სადგურამდე.
ბაქო-თბილისი-ყარსის საერთო სიგრძე 826 კილომეტრი იქნება. დერეფნის მაქსიმალური გამტარუნარიანობა წელიწადში, სავარაუდოდ, 17 მილიონ ტონა ტვირთს შეადგენს. თუმცა საწყის ეტაპზე ეს მაჩვენებელი ერთ მილიონ მგზავრსა და 6,5 მილიონ ტონა ტვირთს გაუტოლდება.
