თბილისი, 7 აპრილი — Sputnik. დიდი ბრიტანეთის ხელისუფლება სრულად უჭერს მხარს აშშ-ის მიერ სირიის აეროდრომზე განხორციელებულ სარაკეტო შეტევას, განაცხადა ქვეყნის პრემიერ-მინისტრის ოფიციალურმა წარმომადგენელმა, იუწყება საინფორმაციო სააგენტო РИА Новости.
„ბრიტანეთის მთავრობა სრულად უჭერს მხარს აშშ-ის ქმედებას, რომელიც, ჩვენი აზრით, სირიის რეჟიმის მიერ განხორციელებული ბარბაროსული ქიმიური შეტევის ადეკვატური პასუხი იყო, და რომელიც მიმართულია შემდგომი [ქიმიური] შეტევების აღკვეთისკენ“, — განაცხადა მან.
პარასკევს, გამთენიისას აშშ-ის პრეზიდენტმა დონალდ ტრამპმა სირიის აეროდრომზე სარაკეტო შეტევის ბრძანება გასცა, საიდანაც სამშაბათს ქიმიური შეტევა განხორციელდა.
პენტაგონის განცხადებით, სარაკეტო შეტევის სამიზნე იყო ჰომსის პროვინციაში მდებარე შაირათის აეროდრომი, რომლის მიმართულებითაც აშშ-ის სამხედრო-საზღვაო ძალების ხომალდებიდან 59 ფრთოსანი რაკეტა გაუშვეს. ბოლო მონაცემებით, შეტევას 5 ადამიანი ემსხვერპლა, 7 კი დაშავდა.
პენტაგონი ასევე აცხადებს, რომ ისინი ცდილობდნენ მინიმუმამდე დაეყვანათ რისკი ბაზის პერსონალის მიმართ, მათ შორის, რუსი სამხედროების მიმართ.
გარდა ამისა, ამერიკულმა სამხედრო უწყებამ სააგენტო РИА Новости-ს განუცხადა, რომ შეტევის თაობაზე წინასწარ აცნობა რუს სამხედროებს კავშირის იმ არხებით, რომლებსაც სირიაში კონფლიქტების აღსაკვეთად იყენებენ.
სირიის ეროვნულმა ოპოზიციურმა და რევოლუციურმა ძალებმა სამშაბათს გაავრცელეს ინფორმაცია, რომ იდლიბის პროვინციის ქალაქ ხან-შეიხუნში ქიმიური შეტევის შედეგად 80 ადამიანი დაიღუპა, 200 კი დაშავდა. ოპოზიციამ თავდასხმაში სირიის სამთავრობო ჯარები დაადანაშაულა. სირიის არმიის სარდლობამ გადაჭრით უარყო ბრალდება და დანაშაულზე პასუხისმგებლობა ბოევიკებსა და მათ მფარველებს დააკისრა.
