თბილისი, 4 აპრილი — Sputnik. სოფელ ნატანებში 250 წლის წიფელი, რომელიც დენდროლოგიურ პარკში გადაჰქონდათ, ტრანსპორტირებისას შუაზე გადატყდა, იუწყება გამოცემა „გურიის მოამბე".
გამოცემის ინფორმაციით, წიფელი საქართველოს ექს-პრემიერმა, მილიარდერმა ბიძინა ივანიშვილმა ნატანებელი პედაგოგისგან 15 ათას ლარად შეიძინა.
მომხდარის გამო დაიკეტა ნატანები-ლეკურის დამაკავშირებელი გზა. ის ხის დაჭრისა და ტერიტორიიდან გატანის შემდეგ გაიხსნება.
ამ წუთებამდე ადგილზე მუშაობენ კომპანის წარმომადგენლები, რომლებიც ხის ტრანსპორტირებას ახორციელებდნენ. სამუშაოებში ჩართულები იყვნენ ადგილობრივებიც.
რა გახდა ხის დაზიანების მიზეზი უცნობია.
ახალ დენდროპარკში, რომლის მოწყობა ბიძინა ივანიშვილის ინიციატივით ურეკში ხორციელდება, 50 უნიკალური სახეობის ხის გადარგვა იგეგმება. პარკი 60 ჰექტარზეა განთავსებული, აქედან ორი ჰექტარი გიგანტური ხეებისთვისაა გამოყოფილი.
