თბილისი, 3 აპრილი- Sputnik. საქართველოს პრეზიდენტმა გიორგი მარგველაშვილმა სანკტ-პეტერბურგის მეტროში აფეთქებისას დაღუპულთა ოჯახებისა და ახლობლების მიმართ ქართველი ხალხის სახელით ღრმა მწუხარება გამოთქვა.
სანკტ-პეტერბურგში მეტროსადგურებს „ტეხნოლოგიჩესკი ინსტიტუტსა“ და „სენნაია პლოშჩადს“ შორის აფეთქება მოხდა, რომლის შედეგად, წინასწარი მონაცემებით, დაიღუპა 10 ადამიანი და 20-ზე მეტი დაშავდა.
„ღრმა მწუხარებას გამოვთქვამ ქალაქ სანკტ-პეტერბურგის მეტროში მომხდარი აფეთქების გამო, რომელსაც ადამიანთა მსხვერპლი მოჰყვა. ქართველი ხალხის სახელით ვუსამძიმრებ და თანადგომას ვუცხადებ დაღუპულთა ოჯახებსა და მათ ახლობლებს“, — დაწერა მარგველაშვილმა საკუთარ Facebook-გვერდზე.
მომხდარი ფაქტის გამო სამძიმარს ასევე გამოთქვამს საქართველოს პარლამენტის თავმჯდომარე ირაკლი კობახიძე, რომელმაც მეტროში მომხდარ აფეთქებას ტერორისტული აქტი უწოდა.
„ღრმა მწუხარებას გამოვთქვამ დღეს, სანკტ-პეტერბურგში მომხდარი ტერორისტული აქტის გამო, რომელმაც უდანაშაულო ადამიანთა სიცოცხლე შეიწირა. ტერორიზმთან ბრძოლა არის თანამედროვე, ცივილიზებული მსოფლიოს წინაშე არსებული ერთ-ერთი უმნიშვნელოვანესი გამოწვევა. ჩვენი, ყველას ვალია, ერთად ვებრძოლოთ იმ მოვლენებს, რომლებიც საფრთხეს უქმნის უდანაშაულო ადამიანთა სიცოცხლეს და ჯანმრთელობას. ვიზიარებ გარდაცვლილთა ოჯახებისა და ახლობლების მწუხარებას, ხოლო დაშავებულებს სწრაფ გამოჯანმრთელებას ვუსურვებ“, — დაწერა ირაკლი კობახიძემ საკუთარ Facebook-გვერდზე.
საქართველოს საგარეო საქმეთა სამინისტროს მონაცემებით, დაშავებულთა შორის საქართველოს მოქალაქეები არ არიან.
