თბილისი, 26 მარტი — Sputnik. საქართველოს ნაკრებისა და საფეხბურთო კლუბ „ლეგიას" შემტევი ნახევარმცველი ვაკო ყაზაიშვილი ზაფხულში, სავარაუდოდ, პოლონურ გუნდს დატოვებს, იუწყება პოლონური გამოცემა Meczyki.
გასული წლის სექტემბერში ყაზაიშვილი ჰოლანდიური „ვიტესიდან" იჯარის უფლებით „ლეგიაში" გადავიდა. საიჯარო ხელშეკრულების ვადა ამ ზაფხულს იწურება.
ქართველი ნახევარმცველის დებიუტი პოლონური გუნდის შემადგენლობაში სექტემბრის შუა რიცხვებში უეფას ჩემპიონთა ლიგის დორტმუნდის „ბორუსიის" წინააღმდეგ მატჩის დროს შედგა. პოლონეთის ჩემპიონატში ის მოედანზე პირველად XI ტურში, გდანსკის „ლეხიასთან" თამაშის დროს გამოჩნდა.
ამის შემდეგ ყაზაიშვილი ძირითადად შეცვლაზე გამოდიოდა და თამაშის პრაქტიკის გამოცდილება მას თითქმის არ მიუღია. საერთო ჯამში ნახევარმცველმა "ლეგიას" სახელით 14 მატჩში 581 წუთი ითამაშა და ორი საგოლე გადაცემის ავტორი გახდა.
გამოცემის თქმით, ამ სიტუაციაში დიდია ალბათობა იმისა, რომ 24 წლის ხავბეკთან „ლეგია" კონტრაქტს აღარ გააგრძელებს.
„ვიტესის" შემადგენლობაში ყაზაიშვილმა 121 მატჩი ითამაშა, 28 გოლი გაიტანა და 13 შედეგიანი გადაცემა განახორციელა.
ამჟამად ყაზაიშვილი საქართველოს ნაკრების განკარგულებაშია.
