თბილისი, 20 მარტი — Sputnik. წუხელ, გვიან ღამით გარკვეული პერიოდის მანძილზე ტრანსპორტის მოძრაობა შეფერხებული იყო ჩაქვთან. ამის მიზეზი ბიძინა ივანიშვილის მიერ ხეების გადატანა გახდა, იუწყება ტელეკომპანია Rustavi2.
წუხელ ასწლოვანი ტიტას ხე ბუკნარიდან ჩაქვის მიმართულებით გადაჰქონდათ. ტრანსპორტირების დროს დაზიანდა კონტეინერი და ამჟამად მისი აღდგენითი სამუშაოები მიმდინარეობს.
გარდა ამისა, ხის გადატანის პროცესში ციხისძირთან ევკალიპტის ასწლოვანი ხე წაიქცა. როგორც თვითმხილველები აცხადებენ, ტრანსპორტირებისას ტიტას ხე გამოედო ევკალიპტის ხეს, რომელსაც ძირი მოერყა და წაიქცა.
ბათუმი-ქობულეთის გზის ბუკნარის მონაკვეთზე კიდევ რამდენიმე ახლად მოჭრილი ხე დააფიქსირეს. ციხისძირის გამგებლის განცხადებით, ეს ფაქტი ტიტას ტრანსპორტირებას არ უკავშირდება და ხეები დიდთოვლობის გამო მოჭრეს.