თბილისი, 17 მარტი — Sputnik. ოპოზიციური პარტია "საქართველოს პატრიოტთა ალიანსი" მედიაკავშირ "ობიექტივის" ჟურნალისტებთან ერთად საქველმოქმედო ფონდის დაარსებას გეგმავს.
ამის შესახებ ბრიფინგზე საქართველოს პარლამენტის ვიცე–სპიკერმა, "საქართველოს პატრიოტთა" ფრაქციის დეპუტატმა ირმა ინაშვილმა განაცხადა, რომელიც მანამდე მედიაკავშირ "ობიექტივის" დირექტორი იყო. ინაშვილის თქმით, ფონდი საქართველოს სოციალურად დაუცველ მოქალაქეებს დაეხმარება.
ოპოზიციური პარტიის დეპუტატები ყოველთვიური ხელფასიდან გარკვეულ თანხას გადარიცხავენ ფონდის ანგარიშზე.
"მე ჩემი, როგორც ვიცე-სპიკერის ხელფასიდან 1500 ლარს ჩავრიცხავ ამ ფონდში", — განაცხადა ირმა ინაშვილმა.
საქველმოქმედო ფონდის სახელწოდება "ობიექტივი" იქნება. ინაშვილმა სხვა პარტიების დეპუტატებს აქციაში ჩართვისკენ და გაჭირვებულთა დახმარებისკენ მოუწოდა.
საქართველოს პარლამენტში ოპოზიციური პარტია "საქართველოს პატრიოტთა ალიანსი" ექვსი დეპუტატით არის წარმოდგენილი.
