თბილისი, 13 მარტი — Sputnik. თბილისის სპორტის სასახლეში 19 მარტს გაიმართება საქველმოქმედო კონცერტი „ბერი ანდრიას ფონდის“ ავთვისებიანი სიმსივნით დაავადებული ბავშვებისთვის.
საღამოს ორგანიზატორია საქველმოქმედო ფონდი „ცხოვრება მშვენიერია“ ორგანიზაცია „საქართველოს ახალგაზრდა პოლიტიკოსების“ მხარდაჭერით.
ბილეთების გაყიდვით შემოსული თანხა მთლიანად მოხმარდება სარეაბილიტაციო სასტუმროს „ბედნიერი სახლი“. ეს იქნება პირველი სახლი, სადაც სოლიდური სიმსივნით დაავადებული ბავშვები და მათი ოჯახები პროფესიულ მომსახურებას სრულიად უფასოდ მიიღებენ.
„სარეაბილიტაციო სახლი ერთდროულად 20 ბავშვსა და მათ მშობლებს 24-საათიან მომსახურებას გაუწევს. ასევე იმუშავებს დღის ცენტრი, სადაც 50 ბავშვი და მათი მშობლები დღის განმავლობაში საჭირო სერვისებს მიიღებენ“, — აღნიშნულია ორგანიზატორების განცხადებაში.
ამ საქველმოქმედო მიზნისთვის სპორტის სასახლის სცენაზე უანგაროდ გამოვლენ ნიაზ დიასამიძე და 33ა, ნიკოლშოუ, Reggaeon, Goofy Land-ი, LOUDspeakers, Windows, ლევან მასპინძელაშვილი და ბენდი და სხვა შემსრულებლები.
ფონდი „ცხოვრება მშვენიერია“ 2013 წელს დაარსდა და აქტიურად მართავს საქველმოქმედო ღონისძიებებს საქართველოში. აღსანიშნავია, რომ ორგანიზაციის ყველა წევრი საქველმოქმედო საქმიანობაში უანგაროდ არის ჩართული.
