თბილისი, 6 მარტი — Sputnik. რუსეთის მოქალაქეებს შორის 8 მარტს უცხოურ მოგზაურობებში თბილისი პოპულარობით მეოთხე ადგილს იკავებს
დღესასწაულზე სამოგზაუროდ ყველაზე პოპულარული ქალაქები შეარჩია სასტუმროების საძიებო სერვისმა RoomGuru.ru. რეიტინგი შედგენილა 2017 წლის 7–დან 9 მარტამდე სასტუმროებისა და აპარტამენტების ორადგილიანი ნომრების დაჯავშნის მონაცემების მიხედვით.
პირველ ხუთეულში შევიდა მინსკი, რიგა, ტალინი, თბილისი და ბაქო. შემდეგ მოდის ერევანი, ბარსელონა, ბუდაპეშტი, რომი და ვენა.
სერვისის მონაცემებით, თბილისის სასტუმროში ერთი დღე–ღამის გატარება დაახლოებით 46 დოლარი დაჯდება.
World Travel Awards-ის პრემიის მონაცემებით, ბოლო ოთხ წელიწადში RoomGuru.ru მსოფლიოში სასტუმროების საუკეთესო საძიებო ვებ-გვერდად არის აღიარებული.
საქართველოს 2017 წლის პირველ ორ თვეში 118700 რუსეთის მოქალაქე ესტუმრა, რაც გასული წლის ანალოგიური პერიოდის მაჩვენებელს 37%-ით აღემატება. იანვარში საქართველოს 62000 რუსეთის მოქალაქე ეწვია (40,3% ზრდა), თებერვალში კი— 56700–ზე მეტი (31,4% ზრდა).