თბილისი, 6 მარტი — Sputnik. საქართველოს საზოგადოებრივი მაუწყებლის გადაცემები ახალ სეზონამდე არ დაიხურება, განაცხადა საზოგადოებრივი მაუწყებლის სამეურვეო საბჭოს წევრმა სულხან სალაძემ.
თებერვლის დასაწყისში საქართველოს საზოგადოებრივი მაუწყებლის ახალმა გენერალურმა დირექტორმა ვასილ მაღლაფერიძემ საინფორმაციო გამოშვებების გარდა ყველა გადაცემის დახურვის შესახებ განაცხადა. მისი თქმით, დაზოგილი თანხები, ძირითადად, საქართველოს საზოგადოებრივი მაუწყებლის ტექნიკურ გადაიარაღებას მოხმარდება. ამ გადაწყვეტილებას არ ეთანხმება თანამშრომლების და უფლებადამცველი ორგანიზაციების ნაწილი.
„მიმდინარე ბადე 17 ივლისის ჩაათვლით იქნება გათვალისწინებული და ყველა გადაცემა ფუნქციონირებას გააგრძელებს. პარალელურად მენეჯმენტი საუბრობს, რომ იგი გამოაცხადებს კონკურსს ყველა დაინტერესებული ჯგუფისთვის სპეციფიკიდან გამომდინარე, რომლებიც შეძლებენ მიიღონ მონაწილეობა ახალ სეზონზე“, — განუცხადა ჟურნალისტებს სალაძემ.
რეფორმა განხორციელდება სრული ტემპით და მაქსიმალურად უმტკივნეულოდ, აღნიშნა საზოგადოებრივი მაუწყებლის გენერალურმა დირექტორმა.
„რა თქმა უნდა, ეს ახალი სეზონისთვის მოხდება, მაგრამ მუშაობა, კონკურსის პროცედურები უკვე 10 მარტიდან დაიწყება“, — განუცხადა ჟურნალისტებს მაღლაფერიძემ.
მისი თქმით, მენეჯმენტმა და სამეურვეო საბჭომ რეფორმის ჩატარებაზე შეთანხმებას მიაღწიეს. საბოლოო გეგმას სამეურვეო საბჭო, სავარაუდოდ, სამშაბათს დაამტკიცებს.
საზოგადოების ზეწოლით სამეურვეო საბჭომ მანამდე მიიღო გადაწყვეტილება, გამართოს კონსულტაციები თანამშრომლებთან, პრეზიდენტთან, არასამთავრობოებთან, საზოგადოების წარმომადგენლებთან და მედიაორგანიზაციებთან და მხოლოდ ამის შემდეგ მიიღოს საბოლოო გადაწყვეტილება.
ახალი ხელმძღვანელობა უკმაყოფილოა საზოგადოებრივი მაუწყებლობის რეიტინგით, რომელიც, 39 მილიონი ლარის დაფინანსების პირობებში, დღეს 1,85%-ს შეადგენს.
