თბილისი, 2 მარტი — Sputnik. საქართველოსა და ბელარუსის პრეზიდენტებმა გიორგი მარგველაშვილმა და ალექსანდრ ლუკაშენკომ მინსკში დამოუკიდებლობის სასახლის საპატიო სტუმართა ხეივანში წიწვოვანი ხე დარგეს.
მარგველაშვილი ბელარუსში ოფიციალური ვიზიტით იმყოფება.
მარგველაშვილის პატივსაცემად ლუკაშენკომ დამოუკიდებლობის სასახლეში ოფიციალური სადილი გამართა, სადაც პრეზიდენტებმა ხალხების მეგობრობის სადღეგრძელო წარმოთქვეს და ასევე საჩუქრები გაცვალეს, აღნიშნულია საქართველოს პრეზიდენტის ადმინისტრაციის ვებ-გვერდზე გამოქვეყნებულ განცხადებაში.
მარგველაშვილმა ლუკაშენკოს მიწვევისა და თბილი მიღებისთვის მადლობა კიდევ ერთხელ გადაუხადა.
უფრო ადრე საქართველოსა და ბელარუსის პრეზიდენტები ერთმანეთს პირისპირ შეხვდნენ, შემდეგ კი — დელეგაციების წევრთა მონაწილეობით. მოლაპარაკებების დასრულების შემდეგ მთავრობებს შორის ხელი მოეწერა შეთანხმებებს საჰაერო მიმოსვლისა და ინვესტიციების განხორციელებისა და ურთიერთდაცვის ხელშეწყობის შესახებ.
პრეზიდენტებმა ასევე მიიღეს ერთობლივი განცხადება, რომელშიც ნათქვამია, რომ ბელარუსი და საქართველო მეგობრული ურთიერთობების ყოველმხრივ გამტკიცებისკენ მიმართულ ინტენსიურ სახელმწიფოთაშორისი დიალოგის გაგრძელებას აპირებენ.