თბილისი, 28 თებერვალი — Sputnik. საქართველოს შს სამინისტროში უბედური შემთხვევის შედეგად სპეცდანიშნულების რაზმის თანამშრომლის გარდაცვალების ფაქტს ადასტურებენ, იუწყება Новости-Грузия სამინისტროს პრეს-სამსახურზე დაყრდნობით.
საქართველოს შსს–ს სპეცდანიშნულების რაზმის 34 წლის თანამშრომლის სოსო ანესაშვილის გარდაცვალების შესახებ ინფორმაცია ქართულმა ტელეკომპანიებმა გაავრცელეს.
„ეს უბედური შემთხვევა იყო. ის ბაზაზე არ მომხდარა. გამოძიება სისხლის სამართლის 276-ე მუხლის მეხუთე ნაწილით მიმდინარეობს (ტრანსპორტის მოძრაობის უსაფრთხოების ან ექსპლუატაციის წესის დარღვევა, რამაც გამოიწვია ადამიანის სიცოცხლის მოსპობა). ის წვრთნებში არ მონაწილეობდა. მეტს ვერაფერს ვიტყვი“, — აღნიშნა შსს–ს პრეს-სამსახურის თანამშრომელმა.
ტელეარხ Imedi–ს მონაცემებით, უბედური შემთხვევა 25 თებერვალს კარალეთში შსს-ს სპეციალური და საგანგებო ღონისძიებების ცენტრის ბაზის ტერიტორიაზე მიმდინარე წვრთნებისას მოხდა. ანესაშვილი გორის სამხედრო ჰოსპიტალში გადაყვანისას, გზაშივე გარდაიცვალა, იუწყება საზოგადოებრივი მაუწყებლის პირველი არხი.
„ის (ანესაშვილი) ნორმატივებს აბარებდა. არ ვიცი, რა მოხდა. ამბობენ, წაიქცა და თავი დაარტყა. სხვა არაფერი ვიცი“, — განაცხადა სპეცრაზმელის მამამ რობერტ ანესაშვილმა Imedi–ს ეთერით.
მის მშობლიურ სოფელში ხელთუბანშია გადასვენებული.
