თბილისი, 27 თებერვალი — Sputnik. გამოჩენილი ქართველი ბალეტის მოცეკვავის, ქორეოგრაფისა და პედაგოგის ვახტანგ ჭაბუკიანის სცენური კოსტიუმები, რომლებიც საზოგადოებას აქამდე არ უნახავს, თბილისში, ჭაბუკიანის სახლ-მუზეუმის განახლებულ საგამოფენო დარბაზში წარმოადგინეს.
განახლებული ექსპოზიციის გახსნა ჭაბუკიანის დაბადებიდან 107-ე წლისთავს ეძღვნება. ღონისძიება 27 თებერვალს ტარდება.
მუზეუმის სტუმრებმა იხილეს კოსტიუმები სპექტაკლებიდან „წითელი ყაყაჩო“, „ოტელო“, „რაიმონდა“, „ლაურენსია“, „ტარას ბულბა“, „კორსარი“, „კარმენი“, „დონ კიხოტი“ და მრავალი სხვა.
ექსპონატები წარმოდგენილია ვახტანგ ჭაბუკიანის სახლ-მუზეუმის მთლიანად განახლებულ საგამოფენო დარბაზში.
პროექტის ორგანიზატორია გასულ წელს დაფუძნებული ორგანიზაცია „მუზეუმების გაერთიანება“, ხოლო ფინანსური მხარდაჭერა თბილისის მერიის კულტურის სამსახურს ეკუთვნის.
„პროექტის მიზანია მუზეუმების გაერთიანების ფარგლებში ახალი საგანმანათლებლო პროექტების შექმნა, ფართო საზოგადოებისთვის მუზეუმების ფონდებში დაცული ექსპონატებისა და საქართველოს კულტურული მემკვიდრეობის ნიმუშების ჩვენება და, რაც ყველაზე მთავარია, ახალი ექსპოზიციებისა და მუზეოგრაფიის შექმნა. დღევანდელი დღე ამ მიზნის ნაწილია და ვახტანგ ჭაბუკიანის დაბადების დღეს ეძღვნება“, — განუცხადა „Sputnik–საქართველოს“ „მუზეუმების გაერთიანების“ დირექტორმა ნინო სანადირაძემ.
კოსტიუმებთან ერთად მაყურებელს ასევე წარუდგინეს ცნობილი მოცეკვავის სხვა საკონცერტო აქსესუარები: სამკაულები, თავსაბურავები, ქამრები, ჰალსტუხები, ფეხსაცმელი, ჩემოდნები, რომლითაც ჭაბუკიანი გასტროლებზე იმყოფებოდა აშშ-ში, ევროპასა და სხვა ქვეყნებში.
გარდა ამისა, გამოფენაზე წარმოდგენილი იყო სახლ-მუზეუმის მუდმივი ექსპონატები — ფოტოები სპექტაკლებიდან, ჭაბუკიანი დასვენების დროს, ოჯახის წევრებთან ერთად, ასევე სხვადასხვა მხატვრების მიერ შესრულებული მისი პორტრეტები.
ჭაბუკიანის სახლ-მუზეუმში შენარჩუნებულია ის ატმოსფერო, როგორიც ამ სახლში მოცეკვავის ცხოვრების დროს იყო. იგივეა ავეჯი და ნივთები: როიალი, წიგნების კარადა, საწერი მაგიდა, საათი, მაგნიტოლა, ფირსაკრავი, ტელევიზორი, საკიდი შლაპით და სხვა.
ოთახებში შესაძლებელია ქორეოგრაფის ორდენების, მედლებისა და ჯილდოების ნახვა. აქვეა წარმოდგენილი ჭაბუკიანის სათვალე და ელექტროსაპარსი.
ერთ-ერთ ოთახში საპატიო ადგილი უკავია პეტრე პირველის ბიუსტს, რომლის ავტორიც ა. შპისია და ის 1876 წლით არის დათარიღებული.
ვახტანგ ჭაბუკიანის სახლ-მუზეუმი 1992 წელს დაფუძნდა, თუმცა მუზეუმი ოფიციალურად 2003 წლიდან ფუნქციონირებს. ჭაბუკიანი ამ სახლში 1947 წლიდან გარდაცვალებამდე — 1992 წლამდე ცხოვრობდა.
მუზეუმი დავით აღმაშენებლის გამზირის 83 ნომერში მდებარეობს და მუშაობს ყოველდღე 11:00-დან 17:00 საათამდე.
