თბილისი, 14 თებერვალი — Sputnik. 16 წლის მოზარდის განზრახ მკვლელობის ბრალდებით პოლიციის თანამშრომლებმა 17 წლის მოზარდი დააკავეს, აღნიშნულია საქართველოს შინაგან საქმეთა სამინისტროს ვებ-გვერდზე განთავსებულ განცხადებაში.
მკვლელობა გუშინ, საღამოს რკინიგზის ვაგზლის სიახლოვეს მოხდა. მოზარდებმა იჩხუბეს, რის შემდეგაც ბრალდებულმა მოზარდს დანა დაარტყა და დანაშაულის ადგილიდან მიიმალა. დაჭრილი საავადმყოფოში მიყვანის შემდეგ გარდაიცვალა.
სისხლის სამართლის საქმე აღძრულია სსკ-ის მუხლით „განზრახ მკვლელობა“, რაც 7-დან 15 წლამდე პატიმრობას ითვალისწინებს.
იმავე დღეს თბილისში მეორე მკვლელობაც მოხდა — ცოტნე დადიანის გამზირზე მოზარდი მოკლეს. მომხდარის მიზეზი ასევე თანატოლებს შორის ჩხუბი გახდა. ყმაწვილს რამდენჯერმე დაარტყეს ცივი იარაღი. ადგილზე მივიდა სასწრაფო დახმარების ბრიგადა, თუმცა ექიმებმა ახალგაზრდის გადარჩენა ვერ შეძლეს.
პოლიციამ ამ საქმეზე ორი ბრალდებული ცხელ კვალზე დააკავა.
