თბილისი, 13 თებერვალი — Sputnik. აშშ-ის საპრეზიდენტო არჩევნებში მონაწილეობდნენ ქვეყნის მოქალაქეობის არმქონე, ორ შტატში დარეგისტრირებული და უკვე გარდაცვლილი მოქალაქეები, იუწყება საინფორმაციო სააგენტო РИА Новости აშშ-ის პრეზიდენტის დონალდ ტრამპის მრჩეველზე სტივენ მილერზე დაყრდნობით.
ტრამპმა უფრო ადრე განაცხადა, რომ 8 ნოემბრის არჩევნების დროს დაფიქსირებული გაყალბების ფაქტების გამოძიების მოთხოვნას აპირებს. სახელმწიფოს მეთაური ირწმუნება, რომ კენჭისყრაში მონაწილეთა შორის არალეგალი მიგრანტები და ის პირები მონაწილეობდნენ, რომლებიც საკუთარ თავს სხვა ადამიანად ასაღებდნენ.
„მილიონობით ადამიანია, რომლებიც რეგისტრირებული არიან ორ შტატში, ან გარდაცვლილია, მაგრამ რეგისტრირებულია კენჭისყრისთვის. სამეცნიერო კვლევებით, არის მოქალაქეობის არმქონე მინიმუმ 14%, რომლებიც დარეგისტრირდნენ არჩევნებზე. ეს გამაოგნებელი სტატისტიკაა“, — განაცხადა მილერმა ტელეარხ ABC News-თან ინტერვიუში.
პროგრამის წამყვანმა მილერს გაყალბების კონკრეტული მტკიცებულებების მოყვანა სთხოვა.
„თეთრმა სახლმა გაყალბების მრავალრიცხოვანი მტკიცებულება უკვე მოიყვანა“, — უპასუხა მილერმა.
წამყვანმა, თავის მხრივ, აღნიშნა, რომ მილერი მხოლოდ იმეორებს ტრამპის განცხადებას, მაგრამ მტკიცებულებები არ მოჰყავს. „უბრალოდ, ოქმისთვის, თქვენ არ წარმოგიდგენიათ არანაირი მტკიცებულება, რომ პრეზიდენტი ნიუ-ჰემფშირში გაყალბების მსხვერპლი გახდა“, — განაცხადა მან.
არჩევნების მსვლელობისას ნიუ-ჰემფშირის შტატში ჰილარი კლინტონმა გაიმარჯვა, მაგრამ ამას ტრამპის პრეზიდენტად არჩევაზე არ უმოქმედია. ამის შემდეგ ტრამპმა სამ შტატში „სერიოზული დარღვევების“ შესახებ განაცხადა. ამ შტატებში — ვირჯინიის, ნიუ-ჰემფშირისა და კალიფორნიის — მისმა მოწინააღმდეგემ მოიგო.
