თბილისი, 11 თებერვალი — Sputnik. შსს-ს აკადემიაში ევროპის საბჭოს კონსულტანტებმა შსს-ს დროებითი მოთავსების უზრუნველყოფის დეპარტამენტის სამედიცინო პერსონალს დაკავებული პირის სამედიცინო შემოწმების დასკვნის მომზადების შესახებ პრაქტიკული ტრენინგი ჩაუტარეს, აღნიშნულია შინაგან საქმეთა სამინისტროს ვებ–გვერდზე განთავსებულ განცხადებაში.
ტრენინგის მიზანი იყო შსს-ს დროებითი მოთავსების უზრუნველყოფის დეპარტამენტის თანამშრომლების კვალიფიკაციის ამაღლება.
ტრენინგის, რომელიც სამედიცინო მიმართულებით მომუშავე 32 თანამშრომლისთვის ჩატარდა, მთავარი მიმართულებები იყო სამედიცინო შემოწმების შედეგების ინტერპრეტაციისა და შესაბამისობის ხარისხის დადგენის საკითხები, დაზიანების ამოცნობისა და აღწერის ტექნიკა, სამედიცინო დასკვნის შევსებისა და ფოტოგრაფირების სპეციფიკა.
სწავლება ევროპის საბჭოსა და ევროკავშირის ერთობლივი პროექტის — „ადამიანის უფლებები და ჯანდაცვა საქართველოს ციხეებსა და დახურული ტიპის სხვა დაწესებულებებში“ — ფარგლებში გაიმართა.
სასწავლო კურსი საქართველოში ევროპის საბჭოს ოფისის ხელმძღვანელმა კრისტიან ურსემ, შსს-ს აკადემიის რექტორმა გივი მიქანაძემ და შსს-ს დროებითი მოთავსების უზრუნველყოფის დეპარტამენტის დირექტორმა უჩა პაპუაშვილმა გახსნეს.
